كلام ستات وشوية تكات

كتبت / عزه السيد

الكلام النهاردة طويل بس مهم قوى لأى حد بيفكر يعمل كيكة وطبعا عايزها ناجحة

علشان نعمل كيكة بنتكلم على( ٣) نقط مهمة …..((المقادير _حجم الصينية _التسوية فى الفرن ))

بالنسبة للمقادير :

_أسهل طريقة تحفظى بيها المقادير هى(٤: ٣: ٢: ١ :١)….يعنى إيه الأرقام دى

_يعنى(٤)بيض_ (٣)دقيق _(٢)سكر _(١)زيت_(١)لبن

_طيب (١)لبن …ممكن أغيرها ل(١)زبادى …ممكن أغيرها ل(١)برتقال)…ممكن أخليها نصف لبن ونصف برتقال…

_طب لو عايزة أعمل كيكة شيكولاتة…يبقى حاستخدم (نصف كوب كاكاو )….ويبقى أشيل من الدقيق (نصف كوب) ..علشان فى الآخر الكاكاو بيعامل معاملة الدقيق

_طبعا الكوب المستخدم هو الكوب المعيارى (اللى هو مج الشاى العادى وحاحط صورته)..ومهم قوى تناسب حجم الكوب مع عدد البيض

_طيب وأنا مغمضة كده المقادير دى تاخد (كيس بيكنج بودر …مايعادل معلقة كبيرة مليانة )…وطبعا ذرة ملح ..ولو كيك كاكاو يبقى أضيف نصف معلقة صغيرة( بيكربونات الصوديوم )

_طيب الكيكة عيزاها هاشة وملاقيش زفارة للبيض …يبقى طبعا مع الفانيليا بنضيف معلقة خل كبيرة (طعمها مش بيبان خااالص)

بالنسبة لحجم الصينية :

_ماينفعش أبدا تاخدى مقادير كيكة من غير ماتعرفى حجم الصينية اللى يناسبها …كده أنا بتوهك وبأخبى عنك حاجة مهمة

_المقادير اللى فوق دى …مناسبة جدا لصينيةمقاس(٢٨)حتاخدى فيها كيكة عالية وممتازة

_طب المقادير دى لو عملتها فى صينية (٣٠)حتدينى كيكة

حلوة بس مش عالية قوى 

_طب لو عملتها فى صينية (٢٦)حتدينى كيكة عالية جدا تنفعنى أعمل تورتة

التسوية فى الفرن :(نقطة مهمة جدا جدا )

_أولا كل ست بيت لازم تكون عارفة فرنها كويس (حامى _ضعيف_بيضعف مع الوقت _مظبوط)_

_أفضل حاجة لخبيز الكيكة هى الصوانى الألومنيوم اللى جوانبها عالية

_لازم الصينية تتبطن بزبدة وتتعفر بالدقيق علشان دى الحاجة اللى خليط الكيك بيمسك فيها ويعلى

_لما أصب خليط الكيك فى الصينية لازم السطح يكون متساوى وده بنعمله بخبط الصينية على الرخامة قبل دخولها الفرن

_الكيك بيتخبز على الشبكة اللى بيكون مكانها نصف الفرن علشان تبقى الحرارة متوزعة من فوق زى تحت (فوق ده اللى هو السهد بتاع الفرن)طبعا مش بأشغل شواية خالص…الفرن من تحت بس

_مش بافتح عليها قبل مرور (٣٥) دقيقة….ولما أشم ريحتها …اختبر سواها بعود شيش ( يطلع نضيف ) …

_الكيكة لوناجحة بتاخد مابين ( ٤٠:٤٥ ) دقيقة

_بأشغل الفرن لما أبدأ أبطن الصينية وحاصب الخليط فيها …الخطأ الكبير مع( احترامى للجميع ) هو تسخين الفرن من بداية عمل الكيك …لأن كده الكيك بيدخل على فرن حامى جدا .. فالنتيجة بتكون إن الكيك بسررعة يأخد لون من فوق ومن تحت وبيكون القلب لسه( نى ) ودى شكوى بنشوفها كتيير على الجروبات

_جربت تسوية الكيك على درجات حرارة مختلفة …ووصلت لأفضل درجة حرارة لتسوية الكيك وهى (١٥٠) الدرجة دى بتسوى الكيك ممتاز ومش بتحتاجى تدخليها على درجة عالية وبعدين توطيها …جربى وحتشوفى النتيجة

_طيب استوت..وتمام ….مستعجلة على إيه سبيها بقى تبرد فى الفرن خااالص علشان تتفادى خااالص حكاية انها لما تخرج تهبط …ممكن تغطيها بفوطة …أو تواربى باب الفرن

_طيب خطوات التسوية دى لو الفرن تمام والصينية المظبوطة …..طب لو انا استعملت الصينية الكبيرة ….يبقى أكيد وقت التسوية أقل علشان المسطح المعرض للحرارة وسع والسمك أقل ..

طيب الكيكة غامقة من جوة ؟

_استعملى سكر فاتح وزيت فاتح …واضربى السكر مع البيض كويس قوى قوى وضيفى عليهم الفانيليا ومعلقة كبيرة خل …أو معلقة عصير ليمون وعمرك ماحتشتكى إن الكيكة غامقة

_غيرى نوع البيكنج بودر اللى بتستعمليه …بيكنج بودر ( دريم ) ممتاز

الكيكة وشها ناشف وفيه قرمشة ؟

_السكر كتييير …والنار عالية

الكيك بيتفتت مع التقطيع ؟

_يبقى انتى بتستعملى( كيك شيف) وده عيبه

علشان تعملى كيكة …لازم تكون حاجتها بدرجة حرارة الغرفة …يعنى الفجر لما تصحى تصلى …خرجى الحاجة من التلاجة وخليها على الرخامة

_طب مستعجلة وطلعت فى دماغى أعملها دلوقتى …حطى البيض فى ماية جارية تحت الحنفية علشان يفقد البرودة بتاعته واستعمليه

_حطى الزبادى فى كوباية فى الميكرويف ياخد (١٠)ثوانى علشان يفقد البرودة بتاعته (ممكن تلاقيه فصل فى الميكرويف …مافيش مشاكل )

_البيكنج بودر …لازم تكونى متأكدة من صلاحيته

_الكيكة تتقطع منها بالطلب ..علشان متسمحيش للهواء يبنشفها من جوة

_أشيك تقطيعة (الشرائح )زى الإنجليش كيك

ازاى أعرف مقاس الصينية ؟

_اقلبى الصينية على ضهرها بيبقى مكتوب عليها المقاس ….لو مافيش …بمسطرة وقيسى والرقم اللى حيظهرلك هو ده مقاس الصينية

ازاى أبطن الصينية من غير حاجة لورق الزبدة 

_امسكى مربع زبدة جامد من التلاجة (ولفى بيه ) بايدك على كل حتة فى الصينية وغطيها تماما بالزبدة …بعد كده رشى( معلقتين دقيق ) وخبطى على الصينية فى كل اتجاه …حتلاقى الدقيق بيمسك فى الزبدة ..بعد كده تخلصى من الدقيق الزيادة ..كده حتقدرى تقلبى الكيك قالب بعد ما تبرد تماما

فى تركة حلوة قوى للكيك ….بعد ماتخلطيها كويس وقبل ماتصبيها فى الصينية ضيفى على الخليط (ربع كوب ماية سخنة )قلبى خليط الكيك …مش حتلاقى أى كلاكيع للدقيق أو للكاكاو …وبتدى طراوة للكيك …وصبى الخليط فى الصينية .