كلام ستات وشوية تكات

كتبت / عزه السيد

١/عايزة الفلفل الحامى ميحرقلكيش ايدك وانتى بتقطعيه ادهنيها بزيت

2/عايزة مطبخك وبيتك على طول نضيف ومعقم تعالى اقولك انا بعمل ايه تعالى متقلقيش

بجيب بخاخة وبحط فيها حبة خل على

نقطتين سائل مواعين وحبة صغيرة خالص

معجون اسنان ومية ورد لو متوفر وبكمل البخاخة ميه

واقولك يا ستى استخدمها في إيه

بعد نهاية اليوم وبعد ما اشطب غسيل المواعين

برش بيها على البوتجاز مقولكيش على اللمعة

والنضافة بيبقى فلة شمعة منورة

ومش بس كده بلمع بيه المطبخ الالوميتال بببقى تحفة

لأ ومش بس كده رخامة المطبخ واتفرجى على النضافة والتعقيم

وخدى بقى الكبيرة بلمع بيها الحنفيات الاستانلس وهم

لاء وكمان بنضف واعقم التلاجة بيها

جربيها علشان هتوفر عليكى كتير ونتايجها مضمونة

3/عايزة الليمون بتاعك يفضل فريش لاطول فترة ممكنة هاتى كل ليمونة وغلفيها بورقة كراسة بس تكون فاضية مش مكتوب عليها حاجة او ممكن حتة من مناديل مطبخ ولفى كل واحدة لوحدها واحفظيها أما في علبة أو كيس وهتنبهرى

4/علشان الالمونيوم تلمع اغسليها بفحم مطحونة وحبة بريل واتفرجى ولا الفضة

او ممكن كمان الصابون البلدى بجد نتيجته روعة

5/للمعان الاستانلس ملح الليمون وادعيلى

6/علشان تحصلى على لون فاتح للتوم ومهما قعد في الفريزر يفضل لونه فاتح وفريش ضيفى معلقة كبيرة خل وادعيلى

7/قشر الليمون مترمهوش هينفعك جدا فى التنضيف ولوعندك كزرولة او كنكة محروقة من كتر الغليان بيرجعها جديدة

8/حطى معلقة نشا للكيكة هتفرق جدا فى هشاشتها ولونها

9/علشان تنضفى الخلاط أو الكبة جديدة حطى قشر بيض متستغربيش وحبة سائل مواعين

وحبة خل وكملى ميه واضربى واتفرجى بنفسك