من القلب للقلب.. أين الأمااان

بقلم /أمل الوكيل

الناس من وجع القلب تقريبًا نسوا إن الحب والارتباط والخطوبة والجواز، كل ده هدفه إن حياتك تبقى أحسن، روحك تهدى وبالك يرتاح،
وتُشبَع نفسيًا وجسديًا، مش عشان تتعب وتمرض نفسيًا وجسديًا..
مفيش علاقة سويّة في الدنيا بتشقّي صاحبها.. مفيش علاقة حب حقيقية يبقى كلها وجع وشد وجذب ولعب بالأعصاب، دي علاقات مريضة..
ربنا يعافي صحابها منها في أقرب وقت، ويعرفوا إن ده مش الطبيعي..
من حق كل إنسان يطمن والله.

واللى بيقولك إنه بيحبك، وعلى الجانب الآخر بيعمل اللي يوجعك، وأنت معرّفه إن ده بيوجعك، مش بيحبك..
الاستنزاف النفسي مش تضحية،
العلاقات المريضة بتدمر صحابها بس، بدون أي فايدة إلا متعة الطرف التانى

‏في نوع من الناس بيستهلك طاقتك على أساس إن ده واجب عليك وإنك مجبر على كده ولو غير كده يتقمصوا، عاوزينك مهتم ومقدر من غير ما تشوف منهم ساعه إهتمام، مبتبقاش عارف إيه جواهم هل بيحبني ولا هو دايماً عاوز يحس إني بحبه وبجد إحساس مرهق من كتر التفكير !