من القلب للقلب.. الحب رحمة

بقلم / أمل الوكيل

الحب اللي مبني على الأنانية وعلى المن (أنا عملت عشانك كذا وكذا ..) قلته أحسن، لان الرحمة فوق الحب. اللي بيحب بجد بيلاقي سعادته في انه يعرف يسعد الطرف الثاني من غير ذل ومزايدة في التعبير عن الحب. الحب فيه رقي عالي وفيه ترفع عن الحاجات الصغيرة.. اللي بيحبك هيشيلك في وجعك وتعبك من غير ما يحسسك انك تقيل على قلبه. مش كل الناس راقية في الحب، ومش كل الناس اللي راقية بتفضل مكملة لآخر المشوار بنفس الرقي. للأسف احنا فهمنا الحب غلط، الحب لا كلام حلو بس ولا مشاعر حلوة بس ولا حتى مواقف بس؛ الحب تفاهم ورحمة ورقي وتناغم. الحب هو انسيابية العلاقة لدرجة انك تحس انهم طرف واحد مش طرفين. أي حاجة تاني مش حب، ممكن يبقى ارضاء غرور، تملك، نزوة، أي بتنجان..
عيدوا النظر في مسميات الحب وخليكوا واقعيين وعيشوا اللي انتو فيه بمسماه الحقيقي ومش معنى ان طرف قال كلمتين حلوين نقول عليه بيعرف يحب. ويا ريت تتخلوا عن سوء الظن عشان تفضلوا مكملين كتير في علاقة محترمة. أما بالنسبة للي بيبرر سوء ظنه أو سوء تصرفه أو سلاطة لسانه انه حب وغيرة ومشاعر زيادة، ده مش حب دي قلة تربية.. الاحترام قبل الحب، وحسن الظن قبل الحب، وطهر القلب قبل الحب، والرقي قبل الحب، والتواضع قبل الحب، والرحمة فوق الحب..