من القلب للقلب…الغلط بيجيب غلط
كتبت أمل الوكيل
من دقايق وصلني خبر عن انفصال مفاجئ بين اتنين متجوزين من فترة قريبة، كنت اعرف ان حياتهم مستقرة .. القصة ان البنت كانت ف علاقة ما قبل الجواز وكان فيها فيديوهات وصور .. ولما اتجوزت تم تسريب الصور والفيديو والزوج وصله خبر. ف أنفصلوا.
الموضوع ده فكرني بحوار شهير اوي حصل سنة ٢٠٠٩ شباب كتير جدًا هيفتكروه .. كان ملخصة في الجملتين دول.
اوعى حد يشوف الفيديو ده يا وليد.
= يابت ده انتي مراتي وشرفي وعمري ما هسيبك.الجملتين دول كانوا بين بنت بتتصور لحبيبها “وليد” وبتأكد عليه ان اهلها لو عرفوا هيقتلوها ف رد قالها انت مراتي وشرفي يا بت. وطبعا بعد شوية اتسرب الفيديو ك مقطع بلوتوث بعدين حد رفع المقطع ع موقع بورنو اجنبي والبنت اتفضحت فضيحة ملهاش مثيل. وانتهت ان اهلها قتلوها.
الخلاصة : الجملتين اللي فوق لخصوا ٩٥٪ من العلاقات اللي من النوع ده بتنتهي ازاي .. مفيش حاجة اسمها (انت شرفي، مراتي، عندي اخوات بنات).. مفيش حاجة اسمها (لأ ده محترم وبثق فيه، لأ ده بيحبني) .. في حاجة واحدة بس اعرفها بتقول : “الحجر الداير لابد من لطه”. و “حرص ولا تخون” .. بعدين ليه عشان نزوة رخيصة تخلي حياتك المستقبلية كلها رعب في رعب ؟! .. فالنهاية : متدخلوش ف علاقات من ورا اهاليكم وتتعدوا الحدود بعدين ترجعوا تندموا.
