من القلب للقلب … رسالة حريمى 2

بقلم أمل الوكيل

انا وجوزي بقالنا فترة عندنا صدمة اجتماعية من كم حالات الطلاق اللي عماله تحصل في محيط العيلة والاصحاب والمعارف ..!!!
فلقيته امبارح فجأه بيسألني:
ايه اللي يخلي الست تاخد قرار (لازم اتطلق) وممكن توصل لدرجة انها تخلع زوجها وتخسر كل حقوقها وممكن تسيب ولادها كمان..!!! في حين ان مفيش راجل ممكن يقول (لازم أطلق)

سكتت لحظه وبعدين قلتله
(إمساك بمعروف او تسريح باحسان) بس كده..!؟
مش فاهم .. اشرحي لي ..!؟
طالما بيحصل طلاق يبقي غالباً احنا بنتكلم علي علاقه مش صحيه .. علاقه مرضت مع الوقت

الراجل في مجتمعنا ممكن يهمل مراته عادي ..
ويهمل البيت وطلباته ومصاريفه عادي .. ويهمل الولاد عادي ..
وما يقضيش طلبات ولا يودي لدكاتره عادي ..
ويقصر في حقوق مراته الشرعيه عادي .. ويتجنبها عادي ..
ويعرف عليها عادي .. ويخونها عادي ..
طبعاً ده لو ما اعترضتش
طيب يطلقها ليه..،!؟
أهي تفضل علي ذمته عااااادي
أهي واخده بالها من البيت وبتربي الولاد..

إنما الست في اغلب المجتمعات العربيه بتفضل تستحمل وتسكت وتحاول تعوض اللي ناقصها وتعمل كل اللي الراجل ما بيعملوش ليها وفجأه تلاقي نفسها بقت مزدوجة الجنس زي الأميبا كده ست وراجل في بعض
هيه اللي فاتحه البيت عادي ..
هيه اللي بتهتم بالولاد عادي ..
هيه اللي بتقضي الطلبات واللي بتودي لدكاتره عادي ..
هيه اللي بتصرف عااادي ..
قلبها بالتدريج نشف من ناحيته ومابقتش حقوقها الشرعيه تعني اي شيئ فعدمها عادي ..
وتبتدئ هيه اللي تتجنبه وما تطيقهوش عادي ..
وما بقاش يفرق معاها خانها مع مين او عرف عليها مين عادي ..
وفجأه تبتدي تسال نفسها هوه انا ليه لِسَّه علي ذمته ..!؟
الوضع ده مش عااااادي
وجوده هوه بقي حمل ثقيل عليها..!!!!
بقي جوزها اثقل حاجه في كل اللي هيه شايلاه ده
جوزها اللي المفروض يكون هوه سندها ..!! بقت هيه اللي سانداه ..!!!

حالة الإصرار علي الطلاق ده للاسف بقي مش بس في حالة ان الست بتشتغل وشخصيتها قويه وقرشها معاها وعندها شقه او ليها اهل او عزوه بس ….!!
لا دي بقت بتوصل اني بشوف ستات ماحيلتهاش الهوا ومتمسكه جداً بالطلاق “بس مش هأفضل علي ذمته”

السؤال الصح
ايه اللي الستات دي بتشوفه لحد ما تطلع من بيتها خسرانه كل حاجه وموافقه علي الخساره …!!!؟؟؟؟
ايه اللي الرجاله بقت بتفشل في توفيره في البيت فمابقاش بيبقي عندها حاجه تبكي عليها .. ليه ما بقاش بيملي حياة وقلب وعين مراته .. وبقي وجوده في حياتها بيقف عليها بالخساره اكتر من انها تبقي في الشارع بشنطة هدومها ومن غيرها احياناً…!!!
فين (إمساك بمعروف)

ولو قلنا يا طلاق .. يقول لها انتي اللي عايزه تتطلقي روحي ابريني او اخلعيني..!!؟؟
فين (تسريح باحسان)