من القلب للقلب …كلنا مضطرون
كتبت امل الوكيل
أصعب شئ في الجواز أنك بتتحول من حالة أنك عايش بطولك إلي حالة أنك مضطر !
مضطر ماتسيبش الشغل اللي فاتحلك بيتك
مضطرة تقومي بدري علشان تنزلي العيال المدرسة
مضطر تقبل أن في ست بتراقبك غير أمك
مضطرة تقبلي أنك مابتنزليش وتطلعي وتخرجي وتشتري قبل ما تفكري في عيالك
مضطر ماتغيرش عربيتك علشان أقساط المدرسة
مضطرة ماتقصيش شعرك علشان جوزك بيحبه طويل
مضطر ماتسافرش مع صحابك علشان المدام هتقفش
مضطرة تبطلي تحبي ظافر عابدين علشان جوزك مش حنين زيه
مضطر ماتعاكسش ستات وتصاحب علشان متجوز والخيانة مش اوبشن في الجواز
مضطرة تقابلي ناس من أهل جوزك أو أصحابه أو أمهات العيال أصحاب عيالك .. حتي لو مش عايزة لكن لازم
مضطر تبقي مع ست بتتخن وتخس وتتنكش وتسرح وتضحك وتعيط وتنجح وتفشل .. وماتفكرش تطلقها أو تقتلها
في الغالب لو اللستة طولت عن كده بتقلب الترابيزة وتمشي وماتبقاش مضطر
ولكن الأغلب أن الناس مضطرة ومكملة
والأحسن أنك تحول كل “مضطر ” في الحياة للحمد لله علي النعمة وتغير من نفسك وطريقة تفكيرك وتستمتع !
