من القلب للقلب .. ماتعايرش بنت الأصول
بقلم/ أمل الوكيل
مفيش راجل او بنت شوفتهم بيتنازلواعن اى حاجة ومتعايريوش !!!!!!
بنت كانت متجوزة فى دبى، جوزها معندوش شقة هنا، باباها رفض غير لما يجيب شقة هنا، وقفت و قالت لأبوها يجيب منين يعنى ! يسرق ؟ بعد ما اتجوزوا و سافروا دبى سمعته بيكلم مامته بيقولها تلاقيها مكنتش لاقية حد يتجوزها علشان كده قبلت.
خالتى قبل ما تتجوز جوزها، مكنتش موافقة عليه، جدتى ضغطت عليها علشان توافق، كان فى الاتفاق هو عليه حاجات و احنا حاجات، و هو بيشترى يقولك لاء اصل الفلوس خلصت معيش فلوس اجيب سجاد ماما تجيبه بداله اصل النجف غالى و مكنتش عامل حسابى خالى يجيبه بداله..و بعد ما اتجوز قالها انتى علشان بايرة اهلك كانوا عايزين يخلصوا منك.
بنت و هى بتتجوز، باعت جزء من شبكتها علشان ميتحوجش لحد، قالتله بعد ما نتجوز تبقى تجيبلى احسن منها..مع اول خناقة قالها ده انتى بعتى دهبك من ورا اهلك علشانى الله اعلم ممكن تبعينى علشان مين ولا تعملى من ورايا ايه.
بنت تانية و هى بتتجوز جابت الفستان و الميكب ارتست و الشعر على حسابها و فهمت اهلها انه مديها الفلوس دى..بعد الجواز قالها انتى كنتى لاقية حد يتجوزك ده انتى كنتى هتموتى علشان يحصل.
الخلاصة : في من ده كتير .. وعمرى ما سمعت الا قليل جداً عن بنت اتنازلت و جوزها قدرها..اهلنا
زمان كان عندهم احساس علشان كده الست لما كانت بتضحى كانت بتتقدر و تتشال على الراس..دلوقتى بيتقال عليها عنست ، بايرة ، مش لاقية ، مسروعة على الجواز.. المفاهيم أتغيرت، ولاد الأصول بقوا قليلين، ف متجيش ع نفسك وتتنازل او ترضى بالقليلي. إفتكر دايمًا إن إللي قبلينا قالوا (إللي معهوش ميلزموش) فمتقللوش من نفسكم
