من القلب للقلب …مشاعر

بقلم / أمل الوكيل

• وتحصلك مواقف وتفتكر نفسك مش قادر تتحملها..تتفاجئ إنك قادر تتحملها !
• وتمر بيك مشاعر وتفتكرها أحلى شعور وتتفاجئ .. ده طلع في أحلى منها !
• وتفارق ناس وتتوهم إن فراقهم قاتل ..وتلاقي نفسك مش مقتول !
• وتقابل ناس كانوا أقرب ناس ليك وتقابلهم تاني وهم أبعد ناس عنك !
• وتقابل حد بعيد أوي عنك ومع أول كلمه بقى أقرب حد لقلبك !
• موقف يحصلك يوجع قلبك وموقف تاني يحصلك عرفت بيه تشيل كل وجع !
• كلمه إتقالت من حد وجعتك .. نفس الكلمه إتقالت من غيره ولا فرقت معاك !
• فكره خلتك محبط مش قادر تعبان وفكره تانيه ملكتك كل الإراده والعزيمه تعمل كل حاجه !
• قرار تاخده تعاقب بيه إللي أدامك ..ونفس القرار تتفاجئ إنك عاقبت بيه نفسك !
• موقف يحصلك تشوفه علامه لبدايه جديده .. ونفس الموقف غيرك يشوفه وجع ونهايه مؤلمه !

مفيش يوم شبه التاني ومفيش شعور شبه غيره .. ومفيش لحظه بتتكرر ..

لأن ببساطه :
( كُلَّ يَوْمٍ هُوَ فِي شَأْنٍ )

وإحنا فينا من روح الله وصفاته ..
(وَنَفَخْتُ فِيهِ مِنْ رُوحِي )

فكل لحظه إنت والكون كله في شأن .. ده الطبيعي .. والقلوب بين إيدين ربنا ، بتتقلب من حال لحال ..

وده الإختبار !
إنك مع كل شأن جديد هتتصرف إزاي ؟ هتتحكم إزاي ؟ هتختار أيه و هتقرر إزاي ؟

رحمه ولُطف من ربنا إن الدنيا بتتغير والحياه بتتغير والمشاعر والبشر ..
من سئ لأحسن ومن أحسن لسئ ..
الخلطه دي هي إللي بتقويك وبتطلع أفضل ما فيك .. بتعلمك قوه وثقه و تحرر من أي تعلق ..

إيمانك بإن هي دي قوانين الدنيا هو إللي هيخليك تعرف تعيش وإنت مطمن في كل الظروف ..