من القلب للقلب… منتهى النفاق
بقلم أمل الوكيل
عندي مشكلة حياتية
فقررت أفضفض يمكن تطلع من عقلي أو حد يديني حل ليها .. أنا كائن ” مندفع ” بيعبر عن مشاعره بزيادة ومابيعرفش يتجاهل لا بشر ولا أحداث
بشوف النضج أنك تواجه مش أنك تطنش .. الحياة قصيرة !
بمعني أن مشاعري سابقة دماغي وبمعني أن لو بكره حد لازم أقوله ولو زعلانة بروح أعاتب مش بسكت ولو حد مزعلني وقررت أبطل اتعامل بعمله بلوك مش عايزة ناس مابتحبنيش في دايرتي ومابحبهاش ناس بوشين او مالهمش شخصية اصلا
عندي مشكلة زي ما بتوصفها دكتورة نفسية صديقة أني علي الريق لازم احط نقطتين فرامل في وداني لمشاعري
مش قادرة أفكر بعقلي واتجاهل اللي بحسه حاسة بمنتهى النفاق
ولا عارفة أسكت وأعيش في مكعب تلج
والناس بتشوفني طفلة .. مندفعة .. عدائية .. متسرعة .. وانا بشوفنى اجدع من رجالة كتير ماعرفوش يدافعوا عن اصحابهم
أنا مش عارفة أتغير ولا أسيطر وهبقي مش امل الوكيل لو بقيت ببتسم وخلاص هبقي نسخة معدلة من روحي .. وأنا مافياش غير ” روح ”
امل الوكيل
