من القلب للقلب .. نضافة قلوبنا

بقلم / أمل الوكيل 

وإنت ماشي من حياة حد … “خد الباب في إيدك” .

لما بنيجي ماشيين من مكان بتسمع كلمة خد الباب في إيدك.، و دا عشان الزيارة خلصت ومش طبيعي تسيب باب اللي سيبتهم مفتوح وحياتهم مكشوفة.

كذلك في الحب والعلاقات لو ماشي من حياة خد  وراك باب اي شيء يكشف اللي جواهم.. احفظ سر عشرتكم.. اقفل عليهم باب يطمنهم ويحسسهم انهم في أمان.. ماتسيبش قلوبهم مكشوفة ولا نفوسهم مجروحة من نظرات حد.. أمنهم وأمن نفسك بالود اللي جمعكم يوم.

غلطانه الناس اللي بتعلق وجعها علي شماعة النهايات.. النهاية يعني احنا ، ذكرياتنا، نضافة قلوبنا، إيماننا بإختيارات ربنا.

الحب رزق والفراق قدر وفي الحالتين لو رضينا هنرتاح..

عيطوا وإتوجعوا وصرخوا ولوموا عليهم لو تحبوا..  لكن لو خلاص ماشي فعلا ودي النهاية ياريت بمنتهي اللطف “تاخد باب قصتك في إيدك”.