هتطبخى إيه النهاردة.. مكرونه بالبشاميل بدون لحمه
كتبت / عزه السيد
مكرونة بشاميل من غير لحمه مفرومة ومن غير بيض
وبكوب لبن بس
ولا حد هيعرف اصلا انها من غير لحمه
بس اعملي الوصفة زي ماهقولك بالظبط
المقادير
نص كيلو مكرونة او كيلو زي ماانتي عاوزة
اتنين بصلة كبيرة او تلت بصلات
فلفل رومي اخضر واحمر وفلفل حامي لو بتحبيه
معلقة توم مهروس
وحبتين طماطم مبشورة
وتلت معالق زيت
في طاسه كبيرة حطي الزيت بسخن انزلي بالبصل يدوب يصفر انزلي بالطماطم والتوم
تتسبك شويه انزلي بالفلفل
دي كميه حشو حلوة مليحها وفلفل اسود وتوابل لحمه
هتحسي انك بتاكلي لحمه بجد
اسلقي المكرونة وصفيها وخلي معاكي كوبيتين من ميه السليق
البشاميل الرهيب
في حله حطي كوب لبن واربعه كوب ميه اتنين ميه عاديه واتنين من ميه سلق المكرونة وملح وفلفل ومكعبين مرقة خضار اولحمه زي ماتحبي
وخمس معالق دقيق قلبي كله علي البارد
وحطي معلقة واحدة سمنه
وارفعيها علي النار وقلبي بالمضرب العادي باستمرار لحد ماتظهر فقاقيع كده البشاميل استوي
هاتي الصنيه ال هتحطي فيها المكرونة حطي شويه بشاميل في الارضية
وانزلي بنص المكرونة وشويه بشاميل عليهم وبعدين بالحشوة
وبعدين باقي المكرونة والبشاميل
ورشي علي وش الصنيه شويه بقسماط ناعم عشان تتحمر وتبقي تحفة
والف هنا
