هتطبخى إيه النهارده..كفتة البرغل

كتبت / عزه السيد

كفتة اقتصادية وكمية كبيرة من نص كيلو لحمة بس وكمان طعمها وريحتها أحلى من الحاتي جربي معايا كفتة البرغل

المقادير:

نص كيلو لحمة مفرومة يكون فيها شوية دهن

كوب إلا ربع برغل (منقوع ومتصفي)

بصلة مبشورة بميةها

طماطماية مبشورة

معلقة كبيرة بيكنج بودر

معلقة صغيرة بابريكا

معلقة كبيرة بهارات كفتة أو لحمة

ملح + فلفل أسود

للتشكيل:

معلقة كبيرة كاتشب (أو معلقة صغيرة صلصة طماطم)

2 معلقة كبيرة زيت

الطريقة:

-ننقع البرغل شوية ونصفيه كويس.
-نخلط معاه البصلة بميةها والطماطم المبشورة والبهارات ونسيبه يتشرب نص ساعة.
– نضيف اللحمة المفرومة + البيكنج بودر + الملح ونبدأ نعجن جامد جدًا لحد ما يبقى خليط ناعم (ممكن في الكبة).
ـ نجهز خليط الزيت والكاتشب ونبل بيه إيدينا علشان الكفتة ما تلزقش، ونشكلها على أسياخ خشب.
ـ نرص الكفتة في صينية مدهونة زيت وندخلها فرن سخن على 180 درجة حوالي 20 دقيقة مع قلبها في النص.
التقديم بقى مع عيش سخن وسلطة طحينة ولا أجدعها مطعم