الفن والثقافة
هـي أمـك
بقلم – الدكتور أمين رمضان
هي أمك
اللي لما.. كل الناس تسيبك تبقى جنبك
ماده إيدها فوق جبينك تمسح الحزن اللي كان
ضمه روحك .. جوه روحها جوه بحر من الحنان
زارعه أيامك أمان
هي أمك
لما تتبعتر .. تلمك لما تتكسر .. تضمك
هي أمك
اللي تاكل .. أي لقمة فاضلة منك
هي أمك
تغزل الأيام .. بأحلامك وهمك
هي أمك
دمعتك .. لما تتجمد دموعك جوا قلبك
فرحتك .. لما تتكسر حياتك .. وتغيب ابتسامتك
هي أمك
اللي روحها .. جوا روحك .. جوا جسمك
حتى بعد موتها ..في أحلامك وضلك عايشة
هي أمـك
بعدها .. ح تكون لوحدك
بعدها .. ح تعيش لوحدك
بعدها .. ح تموت لوحدك
بعد أمـك
9 أكتوبر 2021
