هو مين اللى خلق ربنا؟؟!!.. تعرف على إجابة العلماء

كتبت عزه السيد

هو مين اللى خلق ربنا ؟؟
السؤال دا خلى ناس كتير تلحد لمجرد عدم الوصول لإجابته .
السؤال دا بييجى فى بالى و اكيد بييجي فى بال اى حد .. وبنحاول نستغفر ونبعد التفكير دا عن عقلنا ..

و ده كان أول سؤال بديهي اسأله اما كنت صغير و كان لازم افهم و اعرف الاجابه مقولش استغفر الله و حرام اسأل عشان لما اكبر و طفل يسألهولي اعرف اجاوب مش اقوله روح ماما بتنادي عليك .. و بصراحه لاقيت اجابات جميله اوي و منطقيه من علماء و مشايخ كتير ..
د. مصطفي محمود جاوب علي السؤال ده اجابه منطقيه جداا ..
قال السؤال ده فيه ( مغالطة منطقية ) .. يعني ايه ؟؟ .. يعني اما اسألك مين خلقك و خلق الكون ده ؟ هتقولي ” ربنا ” .. اذن انت معترف ان ربنا خالق .. يعني انت بتسألني :
( ربنا اللي خالق الكون و خالقك ، مين اللي خلقه ؟ )
انت كده حولت ربنا من خالق لـ مخلوق في نفس الجمله !! ، انت كده بتناقض نفسك .. و بعدين تعالي نمشي معاك للاخر ..

و لنفترض جدلا ان في إله خلق ربنا ..
هتقولي طيب مين اللي خلق الإله ده ؟؟ هقولك إله أكبر هتقولي مين خلق الاله الأكبر و بالتالي هندخل في حلقه مفرغة زي بظبط الحلقه المفرغة اللي وقع فيها علماء الرياضه اما بحثوا عن أكبر الاعداد .. لو قولت اكبر الاعداد ديشيليار هقولك خليها ديشيليار و واحد ، ديشيليار و اتنين و هكذا هتقولي تريليون هقولك ترليون و واحد ..
اذن الحلقه المفرغة دي لازم يبقي ليها أول مفيش قبليه.. و ربنا هو الأول و الاخر …
الامام الشعراوي بقي جاوب اجابة أجمل ..
الفعل يعني حدث و الحدث لازم يكون مقترن بزمان او مكان .. اما اقول السفينه دي صُنعت .. مش ( صُنعت ) ده فعل (((( ماضي ))) ؟؟ ها ؟ … طب يعني انت بتتكلم في زمان اهو ..
اذن أي حدث يحصل في الكون اللي احنا عايشين فيه ده لازم يقترن بزمان او مكان لان العالم بتاعنا 4 ابعاد .
3 ابعاد مكان و بُعد رابع اللي هو الزمان طبقا لنظرية النسبيه
لكن انت بتسأل من خلق لله اذن انت بتسأل عن حد (وُجد ) و ( خلق الله ) و دول فعلين ماضيين يعني يندرجوا تحت بُعد الزمان و ربنا مش موجود في عالمنا اصلااا
مش موجود ضمن ابعاد الزمان و المكان اللي انا وانت فيه لان ببساطه ربنا اللي خلق الزمان و المكان اصلا

فربنا لا يمتثل لقوانين العالم اللي هو خلقه ، تخيل انك جبت خشب و بنيت بيت صغير لعصفور هل انت مجبر تعيش في البيت اللي انت بنيته ده ؟؟ اكيد لا و لله المثل الاعلي ، اذن فسؤالك مغلوط .

واحد تاني ممكن يقول : لو انت لسه بتتعرف علي حد دلوقتي هتساله خلف ولا لسه ولا المفروض تسأله الاول اتجوز ولا لسه ؟
الاجابة : لا المفروض اسأله الاول اتجوز ولا لا ، لو قالي اها اتجوزت ساعتها اساله خلف ولا لا
هيرد يقولك : تمااام اوي
طب يعني لو قالك متجوزش هل سؤالك عن الخلفه هيبقي له معني ؟
الاجابة : لا طبعا هيبقي سؤال غبي
هيقول : تمام اوي .. يبقي انت المفروض قبل ما تسألني ( مين خلق ربنا ) المفروض تسألني سؤال قبليه : ( هو ربنا اتخلق ؟؟ ) لو قولتلك اها يبقي أسالني سؤالك .. لكن لو قولتلك لا يبقي سؤالك ملوش معني :.. و الاجابه ان ربنا متخلقش لانه مش مخلوق اذن سؤالك ليس له محل من الإعراب ..

مش عيب ولا حرام ان الواحد يسأل لكن العيب اننا نخاف نفكر او نسأل لا نوصل للالحاد . بالعكس الامام الغزالي كان هو مؤسس منهج الشك و قال ” الشك طريق الوصول إلي اليقين ” .. العيب اني اما يجي طفل يسالني اقوله ماما بتنادي عليك ”
” لم يلد و لم يولد ولم يكن له كفوا احد ”
صدق الله العظيم