وثيقة الأخوة الإنسانية

كلمات الشاعرة / وفاء أحمد

عيش إنسان
عيش إنسان
و خلي عندك شوية إحساس بالغير
و خليك حر زى الطير
عمرك شفت طير بيغير؟
أو حتى اتعلم من الحيوان
مفيش واحد بيقول للتانى إنه قبيح و لا جبان
أو إن مفيش له جاره مكان
يبقى إزاى الإنسان مش قادر يعيش بأمان؟
و الناس مخلوقة سواء
و الاستثناء
بيكون للتقوى
و اللى يعيش حياته بحب
و من غير حقد و لا شكوى.
عيش إنسان
مؤمن و موحد بالديان
اللى خلقنا و خلق كل الأديان
و خلقنا مختلفين لحكمة
إننا نتعارف و نتعاون على فكرة
و قالك عيش مع غيرك
بمودة و رحمة
خليك عادل
و ساعتها الكل
هيكون له شىء فاضل
و مش هيكون بينا محروم
و لا حد جعان ولا عاطل
صحيح مخلوقين درجات
لكن
علشان تساعدنى و أساعدك
و نعين بعض فى الأزمات
و نقرب بينا المسافات
عيش بسلام
قول و فعل
و اوعى تيجى على اللى ملوش حول
لأن معاه ربه
و قادر فى لحظة
يبدل حاله و يرفع شأنه
خليك سند للى ملوش ضهر
و اوعى فى يوم
تصقف للظلم
أو تحسس إنسان بالقهر
و متنساش وسط الزحمة
تاخد بالك من ولدك
و ابنى ابنك و اعمله كيان
قبل ما تعمله بنيان
يرفع راسك فى الدنيا
و يكون سبب تدخل بيه جنة ربك
و طبعا رفقا بالقوارير
أم و زوجة و أخت و بنت و حفيدة
و مهما يصير
خلى حياتها على الأرض سعيدة
ده انت لما تِكَبر بيها بتبقى كبير
عيش بالبسمة
و اوعى تنسى إنها صدقة
تفتحلك 100 باب
ده ربنا بيهيأ الأسباب
و عنده عقاب و ثواب
عيش بالكل و عيش للكل
هتبقى الدنيا ورد و فل و ريحان
و متنساش عيش إنسان

https://fb.watch/dpNCX6YAPE/