جبر الخواطر عبادة
من اختيارات أ.د.نادية حجازي نعمان
كنت قاعدة مع مرات اخويا ولقيتها فجأة بدون مقدمات مكتئبه وحالتها سيئه
طب قومي نعمل الاكل سوا
لا مش عاوزة
كنت بحاول أراضي فيها لكن مفيش أي رجا منها إنها تقوم.. أخويا رجع من شغله بصلها كده وقال: الله ايه قصة الشعر الحلوه دي!!
بعدها مرات أخويا اتحولت لروبوت سعادة في البيت كله، عملت الأكل من غيري، وضبت السفرة روقت البيت لوحدها!!
تيته كانت مخنوقه واحنا عندها فبعد الغدا جدي طلب كوبايه شاي ولما جابتله الكوباية قالها : احلى شويه شاي إنما ايه ما حصلوش وقعد هزر معها شويه وقامت عملت فشار وجابت سوداني ولا كأنه عيد.. لمجرد سمعت كلمه حلوة من جدي.
أخويا جسمه زايد شوية فبدأ يروح چيم، مجرد اسبوع وقال مش رايح فجأة …
أبويا لما عرف خلاه قاعد وقاله : ُ والله وشك نور يا حودا، الخسسان باين عليك اهو، تصدق بفكر اروح الچيم انا كمان!!
نفس اليوم بليل اخويا راح الچيم وخرج مع صاحبه بعدها ” رغم انه مخرجش كدة يمكن من ٣ شهور ”
شوف مجرد كلمه بس بتعدل المايله، بتجبر خاطر وتطبطب على قلوب .. متخيل كلمه !
٢٠٢١/٨/٣
