زمالكاوي فاهم يوجه رسالة لجماهير الزمالك

كتب المشجع الزمالكاوي معتز مدبولي يقول :

بشوف ناس و صفحات كدا من امبارح الساعة ١١ بليل بعد ماتش الاهلي والاسماعيلي و التعادل بيقولو الدوري راح و الدوري زمالكاوي و كلام من دا و بدأو الاحتفالات من دلوقتي…..

تعالي كدا يانجم يا محدث كورة انت و هو!! الزمالك فاضلو ٥ ماتشات والي هو كالمعتاد الزمالك بيستني اي فرصة الاهلي يخسر نقط بدل ما يمسك في الفرصة بقى ويكسب (زي ما الاهلي بيعمل لما الزمالك يخسر نقط) لا دا بتعثر وبيخسر نقط عادي بسبب الاستهتار و الثقة بالنفس الزيادة….

مش انا الي بقولو التاريخ إلى بيقول ٢٠١١ و ٢٠١٩ من سنتين! تعالي كدا يا محدث اقولك ان الماتش الجاي الزمالك عندو الإسماعيلي في الإسماعيلية نفسها دا رقم واحد

تعالي يالي دماغك فاضيه كورة اقولك الزمالك داخل الماتش دا من غير على الأقل ٨٥٪ من قوته الهجوميه بعد تأكيد غياب أشرف بن شرقي(الوحيد القادر على صناعة الفارق بالأرقام مش انا الي بقول…. الوحيد القادر على نقل الهجمة من الدفاع للجهوم في المرتده بسبب ذكاءه و اللعب في المساحات) فانت خسران أهم لعيب عندك في الملعب…. اتبقي شيكابالا بيمثل ١٠٪ إلى اساسا مش بيلعب غير شوط واحد بس…. باقي ال٥٪ متقسم على باقي الفرقة

تعالي نبص على الزمالك آخر ماتشين بعد رجوع الدوري

غزل المحلة و الاتحاد السكندري…. الزمالك بيخطف و بيستني الكورة بعد نص الملعب و الأداء بيتحول ١٨٠ لدفاعي و بيلعب على المرتده (بسبب المدرب كارتي طبعا) و دا لو حصل مع الإسماعيلي مع فريق بيلعب كورة (بسبب إيهاب جلال) و معندوش حاجة يبكي عليها و بيلعب على أرضه…. فالزمالك غالبا هيخسر نقط

نيجي لآخر حاجة و تعتبر من أهم الحاجات جنش و علامات استفهام كبيرة و علامات تعجب وحاجات كتير!! جنش مش الأحق انو يلعب لا هو ولا ابو جبل كل واحد فيهم خد فرصة وضيع نقط على الزمالك .الوحيد الي خد فرصة و بدأ يثبت نفسه هو عواد و دا الأحق (شالنا في ماتش بيراميدز و بعدو المصري بصد ضربتين جزاء و بعدو الإسماعيلي في الكأس و الفريق مطرود منو واحد) و اتصاب في ماتش المقاصه و بعدها ملعبش… واكيد ربنا مش هيسيب حقو و شوفناها كتير (آخرها تألق على لطفي أدام الزمالك و لما رجع الشناوي خسرو من المحله  وحالات تانيه كتير)

الدوري لسه في الملعب يا محدث و فاضل ٥ ماتشات ب ١٥ نقطه

قبل ما تبص على فريق الخصم وخسر أو اتعادل بص على فريقك وشوف هيعمل ايه في الماتشات إلى متبقي عندو!!

الواحد من كتر الصفحات و التحفيل بقى بيقول الموقف دا شوفتو فين قبل كدا و كأن بيتعاد ادامي تاني والنهاية الاهلي بيحتفل بالدوري!!

شوية عاهات بتشجع ومفيش دماغ!!

الدوري في الملعب و لسه بدري مش هقول اكتر من كدا