أرض الأحلام….أوهااام

بقلم/خالد طلب عجلان

مهنتي في البطاقة فلاح ..لكن ماعنديش قيراط أرض.

عندى المقطف والمنقرة والفأس …والمجاور والغبيط والباجور أبو كباس..لكن لا أملك أرض ومهنتي فلاح

وسمعت أنا ورجب وجمال وشعبان عن مشروع الخمسين ألف فدان.

وجرينا على وزارة الزراعة شارع المساحة..وقولنا ناخد أي مساحة في الخمسين الف فدان

وقابلنا هناك المسؤال رجل جدع ومحترم وموزون.

وسألناه أيه الأوراق المطلوبة والهمة والفاس موجود وعمرنا ضاع في الفلاحة .

وإحنا الفئة المطلوبة..ولا في غيرنا هيزرع ويعمر ويحصد وينتج ويصدر.

بصلنا موظف الهيئة على الشكل.. والمنظر.. والهيئة

صحيح هدومنا قديمة شوية وريحة عرقنا كانت فايحة..وإحنا لا مظهر ولا هيئة.

الموظف وأيه المطلوب ..رد سلامة سلامتك عايزين كام فدان من اللي شفناه في الإعلان .

الموظف معاكم كام؟

سلامة معانا الستر بس الهمة موجودة نزرع ونقلع ونحصد قمح وشعير وبرسيم وقطن ونقضي على الدودة.

الموظف آه…آه لوقربتوا شوية من سنة أو من سنتين الأرض خدها مستثمر .

سلامة بص باستغراب.. مستثمر شوف العجب والعجاب..بقى أبني وأخواتة وجيرانه وجدى وأحفاده..في البلد تحت الجميزة نايمين بيحلموا بقيراط أرض..وغريب يزرع أرضي .

وزعق سلامة للموظف ..وبأي حق ياخد أرضي

دي ملك للجميع ومين قلك تبيع شورتني أخذت رأيي.

الموظف :ومين إنت علشان أشاورك.

الأرض للي يدفع غريب قريب مش هتفرق .

سلامة..ومشروع الخمسين ألف فدان…الموظف كلام في كلام آوهام..آحلام ..

وحلمي أزاي أحققه ومهنتي الفلاحة..والأرض واسعة وبراح ماتسيبوا الناس يزرعوها عنب وبرقوق وتفاح.

الموظف تقصد وضع يد..سلامة مش أحسن ماتبقى بور سنين وسنين .

الموظف..ممنوع وضع اليد البلد فيها قانون.

سلامة..سبنا نزرع…وقيدها ضد مجهول.

وفي النهاية  أن تزرع الأرض بوضع اليد أفضل بكثير من مستثمر يتركها بور.