تاكسي إسكندرية .. يا تاكسي الهنا
كتبت – ا. د. نادية حجازي نعمان
الحقيقة التاكسي الأصفر بتاع إسكندرية- ركوبه- متعة غير أي تاكسي فى كل بلاد العالم …وياسلام لو التاكسي اللي ركبت معاه طلع بيك من على الكورنيش ..كده بقى مش مشوار …دي بقت رحلة …بتقول ريتاج محمد إنها لما ركبت التاكسي ده النهارده قالها السواق بفرحه : الجو حلو قوي النهارده
شكلنا داخلين على الشتا
أصل الشتا ده بتاع الفقرا والصيف ده بتاع الأغنيا
…قالت له إزاي ؟
قال لها: الصيف ده من كتر العرق بنستحمى كل شويه وميه وصابون وبنغير كل شويه طقم هدوم واللي محلتوش غير طقمين هيعمل إيه ؟
الشتا ألبس لبسي المقطع كله تحت والطقم اللي حيلتي من فوق وهيبقي جبرت ومحدش هيعرف أنا لابس إيه تحت !!
الصيف خروجات ومصايف وتكاليف ..
الشتا كوبايه شاي سخنه وقعدة قدام التليفزيون .
الصيف ده محتاج مراوح وتكييفات وفواتير كهربا ما ترحمش
…الشتا لأ …تكييف رباني .
الصيف فاكهته غالية… مانجه وبرقوق ومشمش ..
الشتا بقى …بتاع البرتقان أبو ٢ جني( جنيه ) ونص …
الصيف ده محدش بيبقي طايق حد فيه وكل واحد نايم ف اوضه لكن
الشتا ده …كل العيال بتنام ف أوضه واحده متكلفتين عشان يتدفوا…
٢٠٢١/١٠/٩
