ماذا لو عضك كلب؟؟

كتبت ياسمين يحى

عضة الكلب ممكن تنقل فيروس خطير وقاتل اسمه “السعار” الفيروس دا مانعرفش ليه علاج حتي الان, بيدخل الجسم من مكان العضة ويفضل يتحرك في الأعصاب لغاية مايوصل للمخ … وساعتها بيموت المريض لا محالة غالباً

الحل الوحيد اللي نعرفه حتي الآن اننا

_نفضل نغسل مكان العضه بمية وصابون و يفضل المكان اللي في العضة تحت مياه جارية لمده علي الأقل ١٥ دقيقة مش أقل من كده . وبعدين نجري بيه علي أقرب وحده صحية . او مستشفي حكومي يكون فيها المصل .. واللقاح … المصل ( الأجسام المضادة يعني ) علشان يلحق يمسك اي فيروس نزل الجرح.. واللقاح “التطعيم يعني” علشان ينبه جهاز المناعة في الجسم … فيبدأ يحارب الفيروس قبل ما يوصل للمخ .

_ وما بنخيطش الجرح خالص ؛ الا بعد وقت كافي نطمن فيه ان الجرح … نضيف ميه في الميه
و أثناء خياطة الجرح الدكتور بيحقن من المصل حوالين الجرح داير مايدور علشان يحاصر الفيروس

_و مش بنغطي الجرح ؛ لا بنسيبه معرض للهواء

_المصل اللي هو الأجسام المضادة بيتحقن غالباً حوالين الجرح و بقية الجرعة بتتاخد عضل بس في مكان بعيد عن مكان حقنة التطعيم ، و ينفع يتاخد لغاية ٧ أيام بعد العضة

_ التطعيم بقي ده بيتاخد علي طول برده بعد العضة في صورة حقنة عضل بس بتتاخد في الكبار في الكتف لكن في الأطفال في الكتف أو في الفخد من قدام زي بقية التطعيمات لو سن الطفل صغير أقل من سنتين و بيتاخد ٤ جرعات جرعة بعد العضة علي طول و بعدين جرعة علي اليوم التالت و السابع و ال ١٤ بعد العضة و لو الطفل عنده نقص مناعة نتيجة اي حاجة ياخد ٥ جرعات بدل ٤

_ و محتاجين نمشي علي مضاد حيوي بعد العضة

_ طبعًا المفروض اننا بنحاول نقبض علي الكلب و نتابعة لغاية ١٠ أيام و نشوف هيظهر عليه أعراض السعار ولا لا عشان الكلام ده كان بيفرق في العلاج لكن دلوقتي ممكن اه نتابعة ده لو عرفنا نمسكة لكن العلاج و الحاجات اللي قلنا عليها فوق مش هتتغير