حكايات شهرزاد الحالمة…دراسات عليا
كتب أحمد إبراهيم
بلغنى ايها الملك السعيد
ذو الرأى الرشيد
قالو العلم نور يا ساده
وانا بحب النور بزياده
انا إنسان طالب علم
نفسي اطلع مخرج فيلم
خدت شهاده من المفتوح
بعد تعب وسهر وطموح
قالو عنى كلام جرحنى
بس نتيجتى بتفرحنى
خدت شهاده مع تقدير
ربك كرمه وعطفه كبير
قولت اكمل بقى دراسات
قالو مراجع وامتحانات
قولت وماله انا موجود
كلى حماس ادها وادود
روحت امتحانات التمهيدى
داخل ماسك قلبى بايدى
هم يومين بعدها أسبوع
قالو نتيجتك لا ممنوع
انت راسب مش مقبول
قولت اكيد مش انا معقول !!!
لا يا جماعه ده انا م المجتهدين
معقوله بعد حلم سنين
تيجى تقولى بكل بساطه
مش عاوزينك يا شيكولاته
وهنا ادركت شهرزاد الصباح
فسكتت عن الكلام المباح
وقالت للملك شهريار
ان الدراسات العليا فى الجامعات
ليها مطالب وكتير حوارات
ولا يتحملها وينهيها وديا
الا الفهلوى والمبسوط ماديا
والى اللقاء فى حلقه قادمه
