من القلب للقلب.. إللى منك

بقلم/أمل الوكيل

في دراسة علمية بتقول أنك هتقابل في حياتك بمعدل 80 ألف شخص، هتعرفهم ويعرفوك، إلَّا أنُّه مع الوقت، لو أجتمعت بيهم، ووقفتهم، ثم قلتلهم إللي نسيوا أسمي يتفضلوا يقعدوا، نسبة ساحقة منهم هيقعدوا،

لو قلت إللي مش معاه رقم فوني يتفضل يقعد، نسبة كبيرة جدا تانية هتقعد،
لو قلت اللي ميعرفنيش بشكل خاص ومجمعنيش بيه علاقة وطيدة يتفضل يقعد، هتلاقي المتبقيين قليل جدا، ولو قلت اللي ميعرفش ايه اكتر شيء بحبه، وايه اكتر شيء بيزعلني، وأيه حلم عمري، يتفضل يقعد، هتلاقي الـ 80 ألف أنسان صفصفوا ع 3 أو 4 أشخاص فقط.

الدراسة دي حقيقية جدًا وواقعية جدًا، ف من غير ما تعمل ده، دوّر ف اللي حواليك ع الكام شخص دول، وقوم شيلهم جوه عينك، وطد علاقتك بيهم أكتر، حافظ عليهم، متهملهمش عشان ناس نسيوا رقم فونك وأسمك او مش مهتمين أصلا يعرفوا احلامك .. ناسك الحقيقيين هما اللي حافظين أسمك، ولونك، ومزاجك، ونفسك ف أيه ونفسهم أوي لو أنت تحقق اللي نفسك فيه، ناس الحقيقيين مش هيبطلوا يبذلوا مجهود عشان توصل لأحلامك وهيفرحوا ليك كأنك هما بالضبط.