من القلب للقلب ..الحنية

بقلم / أمل الوكيل

أنا بحب الناس إللي دموعها قريبة.. الحنينه.. إللي مع قوتها قلبها رقيق.. وفي مناسبات الحزن والفرح تحس عينهم بتتكلم..

وبحب الناس إللي بتاخد بالها من التفاصيل.. إللي بتقول شكرا بابتسامة.. وإللي بتتوجع عشان طفل بيعيط.. وإللي بتتعذب لما بتشوف مظلوم وتحاول تساعده.. وإللي بتخاف على زعل الناس فبتحاسب على كل كلمة وتصرف..

وبحب الناس إللي ابتسامتها بوابة راحة وسلام.. لما تبتسم تحس إنها بتعرفك على جزء نقي جواك مش بتقابله كتير.. فتلاقي نفسك تلقائيا بتبسم لها وإحساس غريب بالراحة تسلل ليك..

وبحب الناس القوية إللي بتقدر تعتذر لما تغلط.. إللي بتعاتب نفسها قبل ما حد يعاتبها. إللي عارفة عيوبها وبتشتغل عليها.. إللي عشرتها مريحة ووجودها مش مصدر تعب ولا هم لحد.

وبحب الناس المتسامحة.. والبسيطة.. إللي حتى لو زعلانة منك تبتسم في وجهك .. إللي بتجبرك بعد فترة على احترامها وحبها غصب عنك..

أنا بحب أشوف الجمال في الروح.. بحب ألمس وجوده في الكلمة والنظرة والفعل