كلام ستات وشوية تكات
كتبت / عزه السيد
كلام جميل ومفيد
– عاوزه تقوري فلفل حار خايفه من الحراره تمسك ف ايدك
أمسحي ايدك بالزيت
– لو عاوزه تقوري بتنجان وخايفه ايدك تسـود أمسحي ايدك بنص ليمونه
– عايزه تسوي اللحوم بسرعه انزلي عليه بمعلقه من السكر وهدي النار
– وانتي بتحمري بطاطس عايزاها تطلع شيبسي مفيهاش نقطه زيت اقليها نص قليه وخرجيها تبرد ورجعيها بعد كده ا تكمل سوا وتقرمش هتطلع خطييره
– لو الطماطم بتاعتك مش حمرا بتسخني الزيت وتنزلي فيه بمعلقه صغيره بابريكا لمده دقيقه مع التقليب وبعدين انزلي بالطماطم واتفرجي ع اللون بقا وممكن معلقه صلصه بدل البابريكا
– لو ريحة قلي الـسمك بتضايقك ضيفي في الزيت نص ليمونه هتمنع اي ريحه وممكن كمان رشة فانيليا متستغربيش بس جربي هتدعيلي
– لو عاوزه البيتزا زي بتاعت المطاعم ضيفي للعجينه لبن بودره وزعتر
– لو عايزه المخبوزات تبقا طريه غطيها بفوطه مبلوله اول ما تخرج من الفرن او رشيها ببخاخ ميه وغطيها بسرعه
– لو عايزه ه صلصة المكرونه بتاعتك تنافس المطاعم اعمليها ببصل بس تشوحيه لحد ما يدبل بس ما يلونش معاكي وضيفي معلقه صغيره سكر وزيها زعتر ريحان بيبقا خطير جدا
– لو عاوزه المكرونه البشاميل تبقا جوسي يبقا تعملي البشاميل خفيف جدا من البدايه يبقا قوامه شبه الكيك الخفيف
– البشاميل علي البارد بيبقا تحفه ومقداره خمس معالق دقيق للتر اللبن ومعلقه واحده زبده
– الزبادي اساسي في تتبيلات الفراخ علشان بيطريها وبيخليها تستوي كويس
– لما المحشي يستوي وتحمري الفراخ خودي مـلعقتين من السمنه بتاعة تحمير الفراخ وحطيها عليه ودوقي بقا
– الوش بتاع الرز المعمر بييجي من القشطه البلدي ولو مش موجوده استخدمي زبادي ولازم النار تكون عاليه في البدايه
– لو البتنجان بيشرب زيت بنقطعه شرايح بالطول ونحطه في مصفاه عليه رشه ملح بينزل كل الميه اللي فيه ونعفره دقيق ويتقلي مبيشربش زيت
– وعايزه توفير اكتر ومجهود اقل قطعيه شرائح ورصيه ف صينيه جمب بعضه وادهنيه بالزيت خفيف ودخليه الفرن
وبعد مياخد اللون الحلو اقلبيه عل الوش التاني وادهنيه خفيف بالزيت هيطلع معاكي تحفه وبدون زيت كتير وبدون تعب
– متنسيش فصين الثوم مقطعيين في حله المحشي وانتي بتنزلي بالشوربه ريحته هتجيب لآخر الشارع.
