أراء وقراءات
يا رحلة الغربة
يا رحلة الغربة
عَرَفتي آخرك إيه؟
أيام دي ولا دموع
لما أكون فرحان
أو أكون موجوع
يا طاحونة الأيام
والأهل والأوطان
في رحلتك تُهْنَا
تاهت ليالينا
تاهت أهالينا
تاهت خطاوينا
ورجعنا بعد سنين
نبدأ أمانينا
شوق الوطن عالي
والبحر بيلالي
لؤلؤ ورا لؤلؤ
بينادوا ع المينا
والمينا بتغني
شوق وحنية
للناس وللمية
والبحر والقناديل
تهمس في ودن الليل
وتقوله أحزانها
لما هجر ناسها
وسَكِّتْ المواويل
ورجعنا للغربة
تاني في أوطانَّا
وطريقنا لسه طويل
