أراء وقراءات
جنتك كانت في قلبك من سنين
لما الدموع
تصبح جموع
م الغالبانين
اللي على…
باب الأمل واقفين
واقفين على باب الأمل
مستنيين طلة ملاك من البشر
مستنيين طلة قمر
لما يهل في مشيته فوق الحنين
تلقاله نور بيشِع من قلبه الحنون
كأنه نور عايش في أحضان الرشاد
اسمه رشاد
وبسمتة باب للقلوب العطشانين
لما تاخدهم للسماء
ياااااه.. فين الكلام
اللي يواسي حزننا
فين الدموع
أصل الدموع
سالت غزيرة في قلبنا
كل المعاني اتغيرت
لما عرفت نَقَاء
في صورة لواء
إيه التواضع والسماحة في نبرتك
ماشي وعارف سكتك
حاطط في جيبك دنيتك
حاطط في قلبك آخرتك
ماشي على الدنيا بأجمل خطوتك
شايف بروحك بكره فين
جنتك كانت في قلبك من سنين
قبل ما الموت يخطفك
ويسيب قلوبنا في حزنها
غرقانة في بحر الأنين
أقول وداع؟!!!
أصل الوداع للميتين
اللي فوق الأرض لكن مدفونين
شعر / د. أمين رمضان
الإثنين ٣١ ديسمبر ٢٠١٨
