معلومة فى كبسولة .. هند بنت بلد و ” جدعة”
كتبت : أمل الوكيل 
هند عبدالستار بنت عندها 29 سنة وشغالة مساعد مخرج في برنامج تلفزيوني، كانت ماشية في حلوان وفجأة سواق توك توك وقف قصادها وتحرش بيها وضربها بيده على منطقة حساسه في جسمها جرى، حاولت مطاردته فجرى ،سجلت رقم التوك توك وراحت قسم حلوان حررت فيه محضر تحرش ضد صاحبه
الولد اتقبض عليه والنهارده أخد حكم بخمس سنين سجن مشدد وغرامة مالية 1000 جنيه، وبكدة هند تعتبر أول بنت في مصر تاخد حكم في صالحها بخمس سنوات في محضر تحرش، هند طلعت بعد الحكم وقالت ان ابوها قالها متتنازليش وأهل الولد ضايقوها كتير قبل نطق الحكم وانها متكسفتش تنشر قصتها .
لحد هنا احنا ممكن نتناقش في هل الحكم بخمس سنين مشدد يعتبر قاسي أو لا، هل المتحرش فعلا يستاهل يتحبس خمس سنين ولا المدة ممكن تكون أقل، هل في طريقة تانيه لعقاب المتحرشين غير حبسهم كفرض غرامة مالية فقط أو أي حاجه تانيه، لكن بالتأكيد كلنا مجمعين ان أي متحرش لازم يتفرض عليه عقوبة
المشكله بقى في كومنتات الناس تعليقاً على الخبر واللي هي بالتأكيد متاخده من بروفايل هند عالفيسبوك
ودي عينة من الكومنتات اللي اتكتبت زي ما هي بالنص بدون أسامي صحابها:
- دى مبسوطه ومستمتعه اوى ال اختشوا ماتوا فعلا مشفتش واحده لابسه محترم وماشيه كويس وحد عاكسها
انتي أساسا لو محترمه هتجبري أي حد يحترمك ولو قليله الأدب ولبسك مش محترم ودي مش حريه شخصيه زي مالبقر ولاد الكلب بيقولو يبقي تستاهلي كل الي يحصلك
لو عندك حلة فيها لحمة وفي كلاب عاوزة تاكلها هتضربي الكلاب ولا هتغطي الحل
امال لو كنتي حلوة كنتي عملتي ايه
انا لو مكان القاضى هاديلو 10 سنين علشان متحرش معندوش نظر
اذا كان اللبس حرية شخصية فان التحرش واجب وطني استرو نفسكو الاول علشان محدش يتحرش بيكو
وربنا لو انا القاضي لأحكم علي الولد دا بمؤبد مش 5 سنين عشان بيتحرش بواحدة زيك
طب اتسجن ف حاجه نضيفه ي راجل او ع الاقل حاجه كبيره
يعني وانتي لبسه كدا زعلانه عشان اتحرش بيكي ده غبي المفروض كان اغتصبك عشان تلبسي لبس محترم
منك لله ضيعتي مستقبل شاب عشان خاطر تظهري وتعملي شو ليكي
بطلو تلبسو لبس مبتزل وانا متاكد انكم محدش هايجرؤ يتعرضلكم
ده جزء صغير من كومنتات كتير شتمت البنت وابوها واهلها واتهموها في شرفها وانها غاوية شهرة، وكلام يجيب الغثيان ومش مصدق ان في حد من الناس دي ممكن يكون عنده بنت او أخت أو اي انسانه بيخاف عليها او ممكن يطعنها في شرفها لو فكرت تجيب حقها من واحد اتحرش بيها في الشارع ولمس جسمها
وكأن الطبيعي ان البنت لو حد اتحرش بيها ومسكها المفروض تسكت وتحط جزمها في بوقها أو ترجع بيت أهلها معيطه وإلا تبقى غاوية شهرة والكلام ده، والحقيقة بقى ماسخ اوي كلام ان المتحرش مبيفرقش بين جسم المحجبة او اللي بشعرها أو حتى المنتقبة.
ربنا يرحمنا برحمته في السواد ده
