الحساب اكيييد
كتبت/ عزه السيد
في ناس هتتحاسب على أعمار الناس اللي ضيّعوها هَدَر ،
في ناس هتتحاسب على كم الثقة والعَشم والتفاني اللي رموها أصحابها في حجرهم وسابوهم في الآخر موجوعين وتايهين ومكسورين ….
– في ناس هتتحاسب على شهامة الناس معاهم وليهم وجدعنتهم وتضحياتهم اللي هما مقدّروهاش ولا حتى اعترفوا بيها
في ناس هتتحاسب على الذكريات الحلوة اللي اتزرعت جوّا عقول اللي حبّوهم وختموها بنهايات توجع قلوبهم وبدّلوا الذكريات الحلوة بصدمات وفواجع ……يفضلوا فاكرينها طول حياتهم …
في ناس هتتحاسب على كل روح سابوها مُعلَّقة مُشتتّة بدون مُستَقرّ وقرار يريّح فِكرهم
واستخسروا فيهم شعور الرّاحة او انهم يتسابوا على الأقل راضيين متطمنين ….
كل واحد هيتحاسب بفواتير كتيرة جداً ما دفعهاش غير من عُمر غيره ، وما كلّفش نفسه عناء الوقوف في الطابور ….
وشيّل غيره ذنب الحُطام بالكامل …..
– كل واحد هيتحاسب على كل قلب سابه مهزوم مكلوم مُقيم في دوامة ” الاحتياج ” والتعب…
-كل واحد هيتحاسب على كل روح سابها تعيش “يُتم المشاعر” وهي في بداية ربيع العُمر شابت وشالت هموم اكبر من عُمرها بسبب انانيته …
– الفواتير هتخلص وهتدفع
والحساب هيخلص في الدنيا قبل الآخرة
فَـ قبل ما تسيب وتدبح وتظلم …استنى العدالة ونفس المشهد بالنسبة لك هيحصل …
هي مسألة وقت مش أكتر
