صراع السعادة

كتبت/ أ.د.نادية حجازي نعمان

صراع السعادة
سعادة بيضة وسعادة خضرة
سعادة حمرة وسعادة صفرة
سعادة صافية وسعادة عكرة
سعادة بفرحة وسعادة بحسرة
أصل السعادة أنواع
كل نوع وله أتباع
كل صنف وله بياع
فيه يريحك .. بيعمل لغيرك أوجاع
وفيه يتعبك يمكن يسعدهم بالإجماع
ماتقسمش سعادة مع حد بالدراع
فى حتة تانية ….تلاقيها بتتباع
بلاش حوار مع الأنانى الطماع
سيبه بلا رجعة ولا حتى سماع
سيب له سعادته بلا أي صراع
سيب له سعادته وقول له وداع