الكرامة فى الحب

بقلم: أمل الوكيل

يا جماعة الحُب حلو جداً بس إحنا اللي وحشين ، بتفكيرنا و إعتقادنا هو يقولوله ” أدبح لها القطة” و هي يقولوها “جوزك علي ما تعوديه” .. فكل واحد داخل العلاقة و هو مشمر كإنه داخل حرب هو عايز يثبت رجولته و هي عايزة تعوده علي حدوده لحد ما أتحولت العلاقات لحرب ، أتحول العشاق لأعداء كل واحد فيهم واقف ف جهة بيحارب التاني و ف الأخر بيطلعوا الأتنين من الحرب خسرانين و جثة حُبهم وراهم بتنزف خيبة أمل .. طبيعي الواحد ياخد موقف لما يحصل حاجة تضايقه و أنا مؤمنة جداً بوجود الكرامة ف الحُب علي عكس الناس اللي بتقول مفيش كرامة ف الحُب .. الحُب هو الكرامة نفسها يعني أنا لو مش بخاف أجرح شخص أو أقوله كلمة تضايقه أو يعلي صوته عليها و يزعق يبقي مش بيحب أصلاً. ف الفكرة كلها ف خوفك علي زعل الشخص اللي قدامك و تمسكك بيه .. فكرة إنك متمسك بيه رغم أي حاجة دي مُمكن تخليه شخص تاني أفضل بكتير مجرد إحساسه إنك هنا رغم إنك معترض علي حاجات فيه هتخليه يحاول يرضيك.
الحُب فعلاً للشجعان و الأقوياء ، بس المشكلة كلها بتكمن إنك حتي لو كُنت قوي في دفاعك عن حُبك و شجاع في تمسكك بيه و يطلع ميستاهلش طبيعي هتخاف تعمل دا بعد كدا ف لما تقابل شخص كويس هتاخده بذنب اللي قبله من مبدأ اللي أتلسع من الشوربة ينفخ في الزبادي
الحياة أبداً مش عادلة و مفيش حد قال إن الحياة لما تحب هتبقي وردية و مثالية بس علي الأقل ف أخر كل يوم هتلاقي كتف تسند عليه و أنت هلكان .. حد موجود و عايز يشاركك بشاعة العالم و كل همجيته و سوءه.