من القلب للقلب .. مريض نفسى
بقلم / أمل الوكيل
حاجة في القصص اللي بسمعها عن رجالة بتخون زوجاتها، إنُّه مبيكونش مكفي بيته، لا حنيّه ولا مشاعر ولا معيشها في نعيم ولا هو توم كروز في نفسه ولا حاجة. و أغلبهم متجوزين بنات اصغر منهم وممكن في الشكل تكون جميلة لدرجة إنُّه بيتحسد من الناس عليها.
وحقيقي القصة دي بتعملي لخبطة في دماغي .. اللي هو جايب منين الجرأة اللي تخليك عارف إنّك مقصر ومتستحقش الشخص اللي معاك وبعد كل ده تخون وتضرب وتشتم وإذا كان عاجبك؟!
لما فكرت مع نفسي في الاسباب، لقيت إن اغلب الناس دي من وهما صغيرين عاشوا في حرمان، حرمان من مال، من احترام وتقدير، من الشعور بالذات.
اللي هو اغلبهم عنده ماضي سيء .. اللي هو ماكنش حد بيعبره، ماكنش حد بيهتم بيه ولا يعمله قيمة، كان بينضرب من اخواته وولاد عمه واصحابه، فدايماً حاسس إنُّه قليل وجواه شعور بالعار من نفسه.
وده بيخليه أول ما يشم نفسه ويلقى حد اضعف منه، يبدأ يطلع فيه كل العقد اللي عاشها في حياته، فيبدأ يضربه، يشتمه، يخونه ويحسسه إنُّه قليل وده عشان يحس من جواه إن هو كتير بقى وقوي، وهو في الحقيقة مريض نفسي ليس إلا.
